அன்று தெருவில் கிடந்தவர்....இன்று ஊருக்கு வழிகாட்டுகிறார்: யார் இந்த மனிதர்

Report Print Arbin Arbin in இந்தியா

இந்தியாவின் உத்திரப்பிரதேச மாநிலத்தில் ஆசிரியர் ஒருவர் சைக்கிள் மூலம் சென்று ஏழை பிள்ளைகளுக்கு இலவசமாக பாடம் நடத்தி வருகிறார்.

உத்திரப்பிரதேச மாநிலத்தின் லக்னோவில் வசித்து வருகிறார் ஆதித்ய குமார். இந்த வட்டாரத்தில் வாழும் ஏழைப் பிள்ளைகளுக்கு இவர் கடந்த 23 வருடங்களாக சைக்கிளில் சென்று இலவசமாக பாடம் நடத்தி வருகிறார்.

ஒரு ஜோல்னா பை, சைக்கிள் முன்பாக ஒரு தட்டி பின்புறமாக ஒரு தட்டி என்று சுற்றும் இவரை மொபைலில் தொடர்பு கொண்டால் போதும் உடனே அங்கு வந்து குழந்தைகளுக்கு பாடம் சொல்லிக் கொடுப்பார்.

அந்தளவுக்கு சுற்று வட்டாரம் முழுக்க குமார் மிகப் பிரபலம். இவரது சாதனையை லிம்கா புத்தகம் அங்கீகரித்துள்ளது. அதற்காக அவருக்கு சான்றையும் அளித்துள்ளது.

இவருக்கு என்று ஒரு பள்ளிக்கூடம் இல்லை. வகுப்பறை இல்லை. ஆனால் அவரிடம் பாடம் படிக்கும் பிள்ளைகளுக்கோ பஞ்சமே இல்லை.

46 வயது நிரம்பிய குமார், எந்தவிதமான வழக்கமான கல்விமுறையை கடைபிடித்து வகுப்பை நடத்துவதில்லை. நேரடியாக அவரது செயல்முறை மூலம் ஆங்கிலம் மற்றும் கணித வகுப்புக்களை நடத்தி வருகிறார்.

உத்திரப்பிரதேசத்திலுள்ள பார்ருக்ஹபாத் நகரத்திற்கு அருகில் உள்ள சலேம்புர் கிராமத்தில் பிறந்தவர் குமார். கூலித்தொழிலாளர் குடும்பத்தில் பிறந்த குமாருக்கு ஏழைகள் கல்வி கற்பதில் எவ்வளவு சிரமம் என்பது நன்றாகவே தெரியும்.

சிறு வயதிலேயே இவரது பெற்றோர்கள் இவரை பள்ளிக்கு அனுப்பிய நேரம் போக கூலித்தொழிலின்போது கூடவே ஒத்தாசைக்கு வைத்து கொண்டனர்.

அவருக்கு சிறுவதில் வேலை செய்வது பிடிக்கவில்லை. படிக்க வேண்டும் என்பது கனவு. ஆகவே அவர் வீட்டைவிட்டு ஓடிவிட்டார்.

வீதியிலேயே வாழ ஆரம்பித்தார். அப்போது ஒரு ஆசிரியர் இவருக்கு உதவினார். அவரது உதவியால்தான் கல்லூரி வாசல் வரை போனது குமாரின் வாழ்க்கை.

அந்த வறுமை கொடுத்த தர்ம அடி அவரை சேவை செய்ய அழைத்தது. தன்னைபோல தரையில் கிடக்கும் தலைமுறைக்கு வாழ்க்கை கொடுக்க அழைத்தது.

அதனை அன்பாக ஏற்றார் குமார். இன்று தினமும் 200 பிள்ளைகளுக்கு பாடம் நடத்துகிறார். இது குறித்து சர்வதேச செய்தி நாளேடு ஒன்றிற்கு அவர் அளித்த பதிலில், நான் எங்கு வேண்டுமானாலும் போவேன்.

அங்குள்ள படிப்பறிவு இல்லாத மக்களிடம் ‘படிக்காமல் இருப்பது சாபம். படிப்பால் மட்டுமே உங்கள் வாழ்க்கையை மாற்ற முடியும்’ என்று நான் சொல்வேன்.

அதைகேட்டு பெற்றோர்கள் அவரது குழந்தைகளை தினமும் பள்ளிக்கு அனுப்புவார்கள். நான் வறுமையை பக்கத்தில் சென்று பார்த்திருக்கிறேன். ஏனென்றால் என் அப்பா ஒரு கூலித் தொழிலாளி என்கிறார் இந்த அற்புத ஆசிரியர் ஆதித்ய குமார்.

மேலும் இந்தியா செய்திகளைப் படிக்க இங்கே அழுத்தவும்