கேரள பெருவெள்ளம்! சீருடையில் வந்த கடவுள்: நெகிழ்ந்த மக்கள்

Report Print Arbin Arbin in இந்தியா

கேரள மாநிலத்தை ஒட்டுமொத்தமாக புரட்டிப்போட்ட மழை, பெருவெள்ளத்தில் சிக்கியவர்களை மீட்க, ஏராளமான சீருடைப் பணியாளர்கள் களத்தில் இயங்கி வருகின்றனர்.

கேரள மாநிலத்தில் வரலாற்றில் இல்லாத பேரழிவு ஏற்பட்டுள்ளது. தொடர் மழை மற்றும் வெள்ளத்தால் நீர் நிலைகள் நிரம்பி திறந்துவிடப்பட்டுள்ளன.

அதிகப்படியான நீர்வரத்து காரணமாக, மாநிலம் முழுவதும் வெள்ளக்காடாய் காட்சியளிக்கிறது. கேரளாவிற்கு உதவி செய்ய நாடு முழுவதும் இருந்து நிவாரணப் பொருட்கள் குவிந்து வருகின்றன.

ஹெலிகொப்டரிலும், படகுகளிலும் சென்று தேசிய பேரிடர் மீட்பு படை, ராணுவத்தினர், விமானப் படையினர் மீட்பு பணிகளில் ஈடுபட்டு வருகின்றனர்.

மழை, வெள்ளத்தில் சிக்கி இதுவரை 350க்கும் மேற்பட்டோர் உயிரிழந்துள்ளனர். லட்சக்கணக்கானோர் வீடுகளை இழந்து, முகாம்களில் தஞ்சமடைந்துள்ளனர்.

இந்நிலையில் வெள்ளத்தில் இருந்து மீட்கப்பட்ட கோட்டயம் நகரவாசி ஒருவர், மீட்பு பணியில் ஈடுபட்ட என்.சி.சி வீரர்களுக்கு பாராட்டு தெரிவித்துள்ளார்.

அவர் தனது டுவிட்டரில், ’எல்லா கோவில்களும், மசூதிகளும், தேவாலயங்களும் நீரில் மூழ்கியுள்ளன. ஆனால் சீருடை அணிந்த கடவுள் எங்களைக் காக்க வந்துள்ளனர்’ என்று குறிப்பிட்டுள்ளார்.

கோட்டயம் பிரிவு, லட்சத்தீவு பிரிவு என்.சி.சி வீரர்கள் கோட்டயம், பத்தனம்திட்டா, திருவல்லா, மூவாற்றுபுழா, இடுக்கி ஆகிய பகுதிகளில் மீட்பு பணிகளில் ஈடுபட்டு வருகின்றனர். இந்தப் பிரிவில் 60 ராணுவ வீரர்கள், 40 பொதுமக்கள், 600 என்.சி.சி வீரர்கள் உள்ளிட்டவர்கள் அயராது மீட்பு பணிகளில் ஈடுபட்டு வருகின்றனர்.

மேலும் இந்தியா செய்திகளைப் படிக்க இங்கே அழுத்தவும்